Во емисијата „Бизнис21“ на ТВ21, пратеникот од ВМРО-ДПМНЕ, Љупчо Пренџов, одговори на прашањата поврзани со најновата буџетска прераспределба и темпото на реализација на капиталните инвестиции.
Модераторот праша зошто прераспределбата се прави на самиот крај од годината, со оглед дека уште при ребалансот било јасно дека дел од капиталните проекти се реализираат со слабо темпо.
Пренџов, меѓутоа, истакна дека буџетот се полни стабилно и дека државата наплатува повеќе даночни средства отколку во претходните години.
„Доминантното полнење на државната каса доаѓа од два даноци – еден што го собира Управата за јавни приходи, и вториот што го собира Царинската управа. И УЈП и Царината наплатија неспоредливо повеќе средства отколку што било пред да дојдеме на власт. Не се согласувам дека државата не ги наплаќа даноците. Напротив, се наплатуваат согласно закон,“ рече Пренџов.
Говорејќи за капиталните инвестиции, тој повтори дека за прв пат по долго време реализацијата е видлива на терен.
„Како се правеле капиталните инвестиции до пред една или две години можеме да дискутираме, но секој граѓанин денес може да види дека за прв пат оваа година се градат два-три нови автопати на патот кон Охрид. Претходно, парите исчезнуваа, а на терен немаше ништо,“ рече тој.
Пренџов додаде дека градежни активности има и кон Битола, а речиси нема општина во која не се реализираат по неколку значајни инфраструктурни зафати.
„За мене, капитална инвестиција е она што граѓаните го гледаат и што има додадена вредност за нивниот живот. Спремен сум и со бројки да зборуваме колку капитални проекти се реализирани, особено во делот на автопатите,“ рече пратеникот.
Тој посочи дека во оваа прераспределба се обезбедени средства и за проектот за железница, што, како што додаде, е уште една значајна инвестиција која ќе се реализира во наредниот период.