Македонскиот фудбал денеска ја изгуби една од своите најсветли фигури.
На 70-годишна возраст, по кратко боледување, почина Васил Рингов – легендата на Вардар и име кое со златни букви е запишано во историјата на југословенскиот и македонскиот фудбал.
Роден во Струмица, Рингов својот фудбалски пат го започна во младинските категории на Беласица, но неговата судбина беше нераскинливо поврзана со скопски Вардар. Во дресот на најтрофејниот македонски клуб, низ два периоди (1977–1983 и 1984–1986), тој ги доживеа своите најблескави моменти. Со повеќе од 200 одиграни натпревари и неверојатни 92 постигнати гола во силната југословенска конкуренција, Рингов стана симбол на една неповторлива ера.
Неговата меѓународна репутација го однесе и во редовите на загрепски Динамо, како и во германскиот Ајнтрахт Брауншвајг, каде со гордост го претставуваше македонскиот фудбалски талент.
Веста за неговата смрт со длабока тага беше примена од целата спортска јавност. Од Фудбалската репрезентација на Македонија се простија од него со зборови кои ја отсликуваат неговата големина надвор од теренот:
„Денес не жалиме само за човек, туку за едно време на мерка, чест и достоинство. Има луѓе што не си заминуваат. Само се повлекуваат чекор наназад, за да нè гледаат од тишината. Васил Рингов беше од тие. Тивок, исправен, свој. Фудбалот за него не беше сцена, туку одговорност. Не зборуваше многу, ама кога зборуваше, имаше тежина. Кога работеше, оставаше белег.“