Анџелина Џоли го напушта Холивуд за да започне ново поглавје во својот живот, најверојатно надвор од Соединетите Американски Држави. Познатата 50-годишна актерка, режисерка и хуманитарка го продава својот историски имот Сесил Б. ДеМил во Лос Анџелес, вреден 25 милиони долари, каде што живее од 2016 година, а на потенцијални купувачи веќе тивко го покажала, потврдија извори за американските медиуми, пренесува „Пејџ сикс“.
Главната причина за заминувањето е болниот развод од нејзиниот поранешен сопруг Бред Пит (62), со кого конечно постигна спогодба на 30 декември 2024 година, осум години откако го поднесе барањето.
„Не може доволмо да се оддалечи од драмата… единствениот начин да се одмори е да си замине“, рекол Џеј Бенџамин, актер и продуцент чија поврзасност со Џоли датира од 2005 година.
„Таа ќе оди и ќе се опушти – ќе работи само на работи што го покренуваат нејзиното срце, душа и страст. Таа е прекрасна, талентирана и дарежлива жена“, додал Бенџамин.
Џоли и претходно ја изрази својата желба да го напушти Лос Анџелес, нагласувајќи дека е врзана за градот само додека нејзините шест деца со Пит не наполнат 18 години. Тоа ќе се случи во јули оваа година, кога близнаците Нокс и Вивиен го слават својот роденден. Анџелина и Бред ги имаат и синот Медокс (24), роден во Камбоџа, Пакс (22) од Виетнам, ќерките Захара (20) од Етиопија и Шајло (19).
Уште во 2021 година, таа изјави дека го купила имотот во Лос Анџелес првенствено за да биде блиску до таткото на своите деца.
„Сакав да бидам блиску до нивниот татко, кој е само пет минути оддалечен“, рекла таа во тоа време.
Меѓутоа, во интервју за „Харперс базар“ во 2019 година, таа јасно стави до знаење: „Ќе живеам во странство и ќе го сторам тоа штом моите деца наполнат 18 години. Во моментов морам да живеам таму каде што нивниот татко ќе избере да живее“.
Односите со Пит се влошија по инцидент во приватниот авион во 2016 година, кога Џоли го обвини за физички и вербален напад врз неа и децата. Иако ФБИ не поднесе обвинение, на Џоли ѝ беше доделено примарно старателство, а некои од децата оттогаш одлучија да се откажат од презимето „Пит“. Шајло го направи тоа легално на својот 18-ти роденден во 2024 година.
Оваа година, Анџелина планира да живее на релацијата помеѓу Њујорк, каде што го води својот моден колектив Ателје Џоли, Европа, каде што бара „поголема приватност“, и Камбоџа, нејзиниот долгогодишен втор дом чија државјанка е. Џоли долго време се смета себеси за „граѓанин на светот“ со аспирации надвор од родниот Лос Анџелес.