3
Информацијата ја потврди претседателот на Меѓународното транспортно деловно здружение, Неѓо Мандиќ, во изјава за агенцијата Танјуг.
Тој изјави дека по состанокот е започнато повлекување на камионите кои учествуваа во блокадите, со цел да се овозможи непречено движење на сообраќајот, со што протестните активности официјално се ставаат во мирување.
Одлуката на српските превозници доаѓа откако Европската комисија најави нова визна стратегија која треба да го реши проблемот со ограничениот престој на професионалните возачи во Шенген зоната. Ваквиот развој на настаните веќе доведе до прекин на блокадите од страна на превозниците во Црна Гора и Северна Македонија, додека сè уште се чека ставот на транспортните здруженија од Босна и Херцеговина.
Мандиќ нагласи дека одлуката е донесена откако Европската комисија започнала да ја разгледува можноста за воведување специјални визи за камионџиите, што би им овозможило подолг престој во земјите членки на Европската унија и непречено извршување на нивните работни обврски. Тој посочи дека веќе е најавен состанок на работна група во Брисел, закажан за вторник, 3 февруари, на кој ќе се разговара за краткорочни и долгорочни решенија.
Меѓународното транспортно деловно здружение соопшти дека блокадата на товарниот сообраќај е целосно прекината денеска во 15 часот и дека транспортот на стоки продолжува без ограничувања. Во соопштението се наведува дека секое понатамошно нарушување на транспортните синџири би можело сериозно да ги погоди домашните компании и граѓаните.
Во меѓувреме, одлуката на превозниците од Босна и Херцеговина сè уште не е донесена. Мандиќ изјави дека очекува и тие да ја суспендираат блокадата, иако засега нема официјална потврда.
Според најавите, на 3 февруари ќе се одржи и состанок на министрите од земјите од Западен Балкан со претставници на Европската комисија, на кој ќе се разгледува проблемот со статусот на регионалните транспортери во Шенген зоната.