9
Здружението на транспортери на Србија објави блокада на товарниот сообраќај на сите гранични премини со Црна Гора, објави црногорскиот весник „Вјести“. Ова се случило кратко по 18 часот вчера, откако црногорските транспортери претходно во текот на денот објавија дека ја прекинуваат блокадата.
Транспортерите од Србија ги блокираа излезите и влезовите на граничните премини со Црна Гора, додека претходно, заедно со Босна и Херцеговина, Македонија и самата Црна Гора, блокираа само премини со земјите-членки на Европската Унија, потсетува „Вјести“.
Ова ќе предизвика нови проблеми, бидејќи увозот и извозот од и кон Црна Гора се блокирани, забележува весникот.
Вчера Македонија ја прекина блокадата на граничните премини.
Блокадите од страна на возачите на камиони во Црна Гора започнаа на 26 јануари и беа организирани со барања за промени во износот на акцизата што се враќа на превозниците, побрз поврат на ДДВ, подолго работно време за гранични, царински и фитосанитарни проверки, промени во европскиот систем за престој во странство ETIAS итн., потсетува „Вјести“.