9
Комесарот за проширување на ЕУ, Марта Кос, ја откажа планираната посета на Косово за средината на оваа недела поради најновите политички случувања во земјата и распуштањето на косовскиот парламент, објави Косовската радиотелевизија, повикувајќи се на информации од претставници на Европската комисија (ЕК).
Во соопштението на оваа тема, претставници на ЕК посочија дека Кос веќе го информирала косовскиот премиер Албин Курти за својата одлука за време на нивниот телефонски разговор претходно денес, нагласувајќи дека „комесарот Кос има намера да отпатува во Приштина што е можно поскоро“.
Косово е единствената земја во портфолиото на Кос што европскиот комесар сè уште не можел да ја посети, и покрај тоа што ја држи оваа позиција од 2024 година, забележа Косовската радиотелевизија. Причината зошто Кос не го посети Косово минатата година беше институционалната криза во земјата. Веднаш по парламентарните избори на 28 декември, таа објави дека ќе ја посети Приштина „штом се формираат институциите на Косово“.
Поради распуштањето на косовскиот парламент по неуспехот на постапката за избор на нов претседател минатата недела и одлуката на Уставниот суд на земјата привремено да го суспендира претседателскиот декрет со кој тоа беше објавено, посетата на Кос засега нема да се одржи.