3
Макрон потврди во објава на социјалната мрежа „X“ дека голем број на француски војници се ранети во нападот. „Овој напад врз нашите сили, кои се борат против „Даеш“ од 2015 година, е неприфатлив“, изјави Макрон, користејќи навредлив термин за екстремистичката група Исламска држава.
„Нивното присуство во Ирак е строго во рамките на борбата против тероризмот. Војната во Иран не може да ги оправда ваквите напади“, додаде тој. Макрон не кажа кој стои зад нападот. САД и Израел започнаа напади врз Иран на 28 февруари, а Техеран возврати со таргетирање на американски бази низ регионот, како и цивилни локации, вовлекувајќи го Блискиот Исток во ескалација на војната.
Шест француски војници на обука за борба против тероризмот беа ранети во напад со беспилотни летала, соопшти француската војска во четвртокот, само неколку часа откако беше цел и италијанска база во областа. Франција има стотици војници стационирани во регионот Ербил како дел од пошироката меѓународна коалиција која се бори против милитантите на Исламска држава во областа.
Воздушниот напад што се случи ноќеска и ја погоди италијанската воена база во ирачки Курдистан бил намерен, соопшти италијанското министерство за одбрана претходно во четвртокот, а целта му била објект каде што е сместен НАТО персоналот.
Франција распоредува десетина воени бродови, вклучувајќи ја и нејзината ударна група на носачи на авиони, во Медитеранот, Црвеното Море и потенцијално во Ормутскиот Проток како дел од одбранбената поддршка за сојузниците загрозени од конфликтот на Блискиот Исток.