30
Недостигот на „син дизел“ се шири низ Хрватска, земјоделците предупредуваат на сериозни проблеми пред пролетната сеидба
Додека некои дистрибутери воведуваат ограничувања, други веќе целосно ја прекинале продажбата на ова гориво.
Ситуацијата на бензинските пумпи во Хрватска се влошува од час во час, а сè повеќе граѓани и земјоделци пријавуваат дека не можат да најдат „син дизел“.
Во некои случаи, луѓето се принудени да поминуваат и повеќе десетици километри за да стигнат до пумпа каде што уште има гориво.
„Синиот дизел“ е основен енергент за работа на трактори, комбајни и системи за наводнување, како и за транспорт на земјоделски производи.
Се користи и во рибарството, каде што е неопходен за погон на рибарски пловила и за секојдневните активности.
Поради тоа, неговиот недостиг директно го погодува производството на храна и работата на терен.
Од компанијата „INA“ тврдат дека снабдувањето сè уште е стабилно и дека сите видови гориво се достапни на нивните пумпи.
Сепак, воведено е ограничување за купување „син дизел“ до 250 литри по една куповина, без разлика дали се точи во резервоар или во канистери.
Тие наведуваат дека веќе презеле одредени мерки за да го ублажат притисокот врз системот и ги повикуваат купувачите на рационална куповина.
Од „Petrol“ велат дека засега успеваат да го одржат снабдувањето, но признаваат дека може да има мали отстапувања во зависност од локацијата.
За разлика од нив, од „Lukoi“ наведуваат дека „синиот дизел“ во моментов воопшто не е достапен на нивните пумпи.
Причината, како што велат, е економска – набавната цена на ова гориво е поголема од регулираната малопродажна цена, што ја прави продажбата неисплатлива.
Владата на Хрватска на почетокот на март ја ограничила цената на „синиот дизел“ на 0,89 евра по литар.
Без оваа мерка, според проценки, цената би била повисока од еден евро.
Сепак, токму оваа регулација сега создава дополнителен притисок врз дистрибутерите и пазарот.
Од Хрватската земјоделска комора предупредуваат дека недостигот на „син дизел“ директно ја загрозува пролетната сеидба.
„Во момент кога временските услови се клучни, а роковите кратки, недостигот на гориво ги доведува производителите во ситуација да не можат да ги извршат основните работи“, наведуваат од Комората.
Тие додаваат дека тоа може да има долгорочни последици, не само за годинашниот род, туку и за целокупната стабилност на земјоделството и снабдувањето со храна, пренесува „Dnevno“.