9
Според наводите на украински извори, Русија во последните 24 часа го извршила досега најинтензивниот бран напади со беспилотни летала од почетокот на конфликтот, при што кон цели ширум Украина биле упатени околу 900 дронови. Оваа информација ја пренесува порталот „Бизнис инсајдер“, повикувајќи се на податоци од украинска страна.
Како што се наведува, со тоа е надминат претходниот рекорд забележан во јули 2025 година, кога биле лансирани 728 ударни беспилотни летала, главно од типот „Геран“. Украинските власти уште во септември истата година укажуваа на зголемен интензитет на нападите, наведувајќи дека во одделни денови биле регистрирани и до 810 лансирани дронови.
Новите податоци, како што истакнува „Бизнис инсајдер“, ја зголемуваат загриженоста дека Русија забрзано го зголемува производството на беспилотни летала со долг дострел, што ѝ овозможува да изведува помасовни и почести напади.