Меморандум за разбирање со Соединетите Американски Држави за унапредување на безбедноста на снабдувањето со природен гас, потпиша во Вашингтон министерката за енергетика Сања Божиновска со заменик-државниот секретар на САД, Кристофер Ландау. Меморандумот е дел од стратешкиот дијалог со САД. Детали што конкретно предвидува Меморандумот и за кои и какви проекти за сега нема.
-Документот предвидува и конкретни чекори за развој на инфраструктурата, подобрување на транспарентноста на пазарите на гас, со што се отвора можност за користење на јавни и приватни финансиски инструменти, вклучително и поддршка од меѓународни финансиски институции и извозни кредитни агенции. Фокусот на разговорите е јасен – енергетска безбедност, економска соработка и конкретни проекти што носат стабилност, инвестиции и развој, изјави Сања Божиновска, министерка за енергетика.
Од Министерството за енергетика соопштија само дека Меморандумот ја потврдува заедничката заложба за диверзификација на изворите и рутите за снабдување со природен гас, зголемување на отпорноста на енергетскиот систем, обезбедување стабилен, сигурен и достапен гас за државата, јакнење на регионалната поврзаност и интеграција на пазарите.
Министерот за внатрешни работи, Тошковски пак од Вашингтон пак порача дека Стратешкиот дијалог со САД носи конкретни резултати за безбедноста.
-Министерството за внатрешни работи добива поддршка од околу 3,5 милиони долари од Соединетите Американски Држави, коишто ќе бидат насочени особено во делот на Граничната полиција и борбата против тероризмот и транснационален организиран криминал. Така да сметаме дека со сите овие заеднички чекори коишто ги преземавме во минатото и со сето она што ќе следи во иднина и те како ќе ја зајакнеме безбедноста, не само на Македонските граѓани, туку и на сите оние коишто да речеме транзитираат низ Македонија и секако би можело да влијаат на било каков начин и на безбедноста и на Соединетите Американски Држави, изјави министерот за внатрешни работи, Панче Тошковски.
Детали за какви проекти и инвестиции се разговарало на вториот Стратешки дијалог меѓу САД и Македонија не откри ниту премиерот.
-Ние имаме заедничка усогласена изјава кога станува збор за царинските тарифи. Истата е потврдена. Потврдени се некои други инвестиции коишто допрва ќе следат, изјави премиерот Мицкоски.
Тој вчера само најави отворање на рудник за антимон во кривопаланечко, кој ќе биде американска инвестиција во рамки на стратешкото партнерство. Планот е антимонот од Лаке да се извезува во Оклахома и да се отвори рудник кај Крива Паланка.