Вицепремиерот и министер за транспорт, Александар Николоски, објави дека скопскиот и охридскиот аеродром ја потврдуваат својата лидерска позиција во регионот, што е нотирано и од специјализираните меѓународни воздухопловни медиуми. Според податоците пренесени од порталот „EX-YU Aviation News“, Меѓународниот аеродром Скопје бележи раст од 32% во споредба со истиот период минатата година.
„Меѓународниот аеродром Скопје останува лидер во регионот со раст од 32 % споредбено со истиот период минатата година. И покрај минималното намалување од околу 6 илјади седишта поради влијанието на конфликтот на Блискиот Исток, аеродромот останува високо рангиран со понудени над 390 илјади нови седишта за оваа година“, истакна Николоски во својата објава.
Во првите месеци од 2026 година, македонските аеродроми бележат зголемување од 30% во бројот на патници и околу 20% во бројот на авио-операции. Министерството за транспорт го припишува овој успех на тековните политики за развој на авиосообраќајот, во чии рамки за само две години се воведени рекордни 24 нови авиолинии кон европските центри.
Како дел од најновите проширувања на мрежата, Николоски ги издвои следните дестинации:
Од Скопје се воведени линии кон Неапол и Будимпешта, а наскоро започнуваат и летовите кон Палермо и Алгеро.
Од Охрид се воспоставени линии кон Милано и Братислава, додека во јули започнуваат операциите кон Катовице и Вроцлав.
Вицепремиерот најави дека се очекува оваа година да се надмине бројката од 3,5 милиони патници, со амбиција во 2027 година таа да достигне 4 милиони. Како клучен инфраструктурен приоритет е наведена реконструкцијата и проширувањето на аеродромот „Св. Апостол Павле“ во Охрид, со што ќе се зголеми капацитетот за патници и операции.
Во однос на глобалната енергетска криза, министерството уверува во стабилност на состојбите. „Во однос на актуелните состојби со горивата, Македонија има стабилна состојба, во континуитет се врши координирање со сите институции и засега авиосообраќајот се одвива непречено“, потврди Николоски.