Пропадна и последната надеж на осудените за „27 април“ за повторување на кривичната постапка, односно да им се суди повторно, бидејќи Апелациониот суд донесе одлука со која пресекува да не им се прифати барањето.
-Жалбата е неоснована. Судиот го ценеше жабениот наод за сторена суштествена повреда на одредбите на кривичната постапка од член 415 ст.1 т.11 од ЗКП, меѓутоа истиот не го прифати како основан, со оглед да образложеноро решението не содржи такви недсостатоци поради кои што не би можело да биде испитано во однос на неговата правилност и законитост, изреката на решението е јасна и разбирлива, а во образложението се содржани доволно причини за решителните факти и завземени правни ставови на судот, се вели во одлуката на Апелациониот суд.
Со ваквата одлука Апелација го потврдува решението на Кривичниот суд донесено на 15.12.2025 година, со кое исто така се одлучува дека нема законски простор за повторување на постапката.
Судот правилно оценил дека изнесените факти не се подобни да причинат ослободување на лицето што било осудено или негова осуда по поблаг кривичен закон…Советот не може да се впушти во оценување дали во конкретниот случај од страна на судијата или јавниот обвинител се сторени кривични дела кои се застарени, како и тоа дали исказот на загрозениот сведок бил лажен, се наведува во одлуката.
Обвинетите во неколку наврати најавуваа дека ќе бараат повторување на судењето и дека не сакаат амнестија.
-Тие луѓе не бараат амнестија, тие бараат правда. Јас сум прв кој се залага за правда, но тоа е надлежност на обвинителството, судовите, велеше премиерот Христијан Мицкоски на почетокот на мандатот.
Во врска со упадот во Собранието, во затвор се 16 лица, правосилно осудени на казни од 7 до 16 години затвор за делото „терористичко загрозување на уставниот поредок и безбедноста“. Највисока казна од 16 години доби Митко Чавков, поранешен директор на Бирото за јавна безбедност, кој тогаш имаше „златна команда“ за протестите пред Собранието.
Дел од обвинетите во случајот добија амнестија со законот кој беше донесен во Собранието кон крајот на 2018-та, односно пратеници од коалицијата на ВМРО-ДПМНЕ Љубен Арнаудов, Сашо Василевски, Крсто Мукоски, Љупчо Димовски и Јохан Тарчуловски, од кои тројца гласаа за промена на името на државата.