Трагедија се случила синоќа во италијанскиот град Катанцаро, каде што 46-годишна жена се фрлила од третиот кат на зграда заедно со своите три деца, информираат италијанските медииуми.
Мајката починала на самото место, како и нејзините две деца, едното на возраст од четири години, а другото четири месеци. Третото дете, девојче на пет и пол години, е хоспитализирано во критична состојба на одделението за интензивна нега.
Истрагата ја води мобилната единица на полицијата во Катанцаро, а ја координира државниот обвинител Грациела Вискоми.
Најверојатната хипотеза со која работат истражителите е убиство-самоубиство. Се претпоставува дека 46-годишната прво ги фрлила децата од балконот, а потоа и самата скокнала.
Форензичарите извршија увид на лице место во станот, а се прегледуваат и снимки од безбедносните камери од околните згради, што би можело да помогне во расветлувањето на околностите. Иако се чини дека нема сомнение дека станува збор за намерен чин, истражителите сакаат да спроведат детална истрага за безбедно да се исклучи вмешаноста на трети страни, што во моментов не се смета за веројатно.
Државното обвинителство во Катанцаро потврди во соопштение дека жената претходно покажувала знаци на ментални проблеми.
Се наведува дека истрагата продолжува за да се „разјасни динамиката на настаните и мотивите на овој неразбирлив чин, кој е поврзан со менталната состојба на жената“. Според првичните информации, таа страдала од блага форма на депресија која се развила по раѓањето на нејзината трета ќерка.
Соседите ја опишуваат како тивка, резервирана и многу религиозна личност, која била активно вклучена во животот на нејзината парохија. Кога спасувачите пристигнале на местото на трагедијата, таа држела бројаница во раката.
Сопругот спиел за време на драмата
Во времето на трагедијата, сопругот на починатата жена спиел во станот и наводно не забележал ништо. Дури откако слушнал бучава и сфатил дека нема никој во станот, се симнал на улицата и затекнал ужасна сцена.
Истрагата во станот, заедно со форензички експерти, ја спроведоа државниот обвинител Грациела Вискоми и началникот на мобилната полициска единица, Росарија ди Блази.