Коалицијата ВЛЕН, која настана како сојуз на пет политички субјекти, објави дека ја финализира својата трансформација во еден единствен политички субјект. Според партиското соопштение, овој потег доаѓа како одговор на потребата на Албанците во Македонија за суштинска промена, чесно претставување и политика која во центарот го става граѓанинот, а не тесните партиски интереси.
Новиот политички субјект ќе се заснова на модерен концепт кој ги почитува традиционалните вредности, но воведува хоризонтално и инклузивно лидерство. Од ВЛЕН нагласуваат дека моделот на одлучување повеќе нема да зависи од поединец, туку ќе се темели на заедничка одговорност и меѓусебна доверба.
Од коалицијата, која сега се окрупнува, не штедеа критики за своите политички опоненти, истакнувајќи дека овој развој предизвикува страв кај оние кои со години го третирале политичкото претставување како приватна сопственост.
„Колку повеќе се приближува моментот на формирање на ВЛЕН како единствен субјект, толку повеќе расте нервозата кај оние кои не се помируваат со губењето на својата тежина на албанската политичка сцена. Овој процес е неповратен“, се вели во соопштението.
Со обединувањето под едно знаме и една политичка идеја, ВЛЕН најавува дека нивниот идентитет ќе биде јасен и насочен кон рушење на досегашните монополи во застапувањето на Албанците. Тие порачуваат дека нивното доаѓање на политичката сцена како компактна сила ќе донесе нова динамика и одговорност во институциите.
„ВЛЕН доаѓа“, заклучуваат од субјектот, испраќајќи порака дека се подготвени за новите предизвици како унитарна политичка организација.