Андреј Жерновски, член на Извршниот одбор и секретар за меѓународна соработка на СДСМ, на денешната прес-конференција упати остри обвинувања до премиерот и лидер на ВМРО-ДПМНЕ, Христијан Мицкоски, за континуирано лажење на граѓаните во врска со Преспанскиот договор и употребата на уставното име на државата.
Жерновски посочи дека ВМРО-ДПМНЕ води нова кампања со која, спротивно на вистината, тврди дека ниту Мицкоски, ниту партијата некогаш ветиле поништување на Преспанскиот договор или враќање на старото име.
„Мицкоски клечеше и молеше да дојде на власт ветувајќи го ова за кое што денеска зборуваме, лажејќи ги граѓаните дека ќе го направи спротивното од тоа денеска што го прави. Целата кариера ја изгради врз основа на лагата дека кога ќе дојде на власт ќе го поништи Преспанскиот договор“, изјави Жерновски.
Тој го потсети Мицкоски на неговите изјави дадени додека беше во опозиција, како што се: „Се додека сум во ВМРО-ДПМНЕ, Преспанскиот договор нема да биде завршена работа“, „Ќе го менуваме Преспанскиот договор“ и ветувањето дека ако стане премиер, никогаш нема да каже „Северна“, во спротивно да му го одземат мандатот.
„Токму кога го доби мандатот, кога даваше заклетва, го кажа Северна толку силно што уште одзвонува во салата на Собранието“, рече Жерновски, додавајќи дека и претседателката на државата во нејзиниот говор во Обединетите нации го употребила името „Северна“ повеќе отколку целата претходна влада.
Според Жерновски, Мицкоски на фаќањето во лага одговара со нова лага, посочувајќи го како пример предлогот на ВМРО-ДПМНЕ за закон за двојно државјанство, кој се однесувал само на идниот пратенички состав. Откако СДСМ предложил поодговорно решение – ниту еден член на Влада или именуван функционер да нема двојно државјанство, Мицкоски се повлекол под изговор за консултации со експерти за Уставот.
„Кој Устав сега го проверувате? Оној вашиот македонскиот или оној вашиот бугарскиот? Тоа е вистинското лице на ВМРО-ДПМНЕ. Тоа е партија којашто патриотизмот го користи во популистички цели, а во позадина вадат бугарски државјанства. Не може да се создаваат намерни конфликти со Бугарија, на тоа да се печалат патриотски политички поени, а во позадина да се живее и да се патува со бугарски пасош“, обвини Жерновски.
Тој заклучи дека „најголема закана за нашиот идентитет всушност е самата ВМРО“, која со лажниот патриотизам секојдневно ги уништува позициите на државата, и најави дека СДСМ ќе продолжи да ја открива вистината.