Насилството врз жените и девојчињата, како и јакнењето на институционалниот одговор, беа во фокусот на денешната средба меѓу Жаклина Пешевска, претседателка на собраниската Комисија за еднакви можности на жените и мажите, и д-р Аким Али, претставник на Светската здравствена организација (СЗО) во Северна Македонија.
Според собраниското соопштение, соговорниците се согласиле дека за справување со насилството врз жените е неопходен интегриран и координиран пристап, со силна меѓусекторска соработка, при што посебен акцент е ставен на активната улога на здравствениот систем. Беше нагласено дека здравствените услуги често се првата точка на контакт за жените жртви на насилство, поради што е од клучно значење здравствените работници навремено да ги препознаат знаците и да обезбедат соодветна поддршка и упатување. Во таа насока, потенцирана е и важноста насилството соодветно да биде препознаено во здравствената регулатива и стратешките документи.
На средбата, како што информираат од Собранието, се разговарало и за пошироките аспекти на родовата еднаквост и социјалната правда. Беа опфатени предизвиците со кои се соочуваат жените во политиката, економијата и секојдневниот живот. Како конкретен пример за важноста на социјалната и здравствената еднаквост, било посочено прашањето за породилното отсуство на жените во земјоделството.
За време на разговорот била истакната и улогата на собраниската Комисија, која, како што се наведува, досега има одржано надзорни и јавни расправи посветени на насилството врз жените и спроведувањето на Законот за спречување и заштита од насилство врз жените и семејно насилство. Истовремено, нагласена е потребата од континуитет во институционалниот одговор и следење на имплементацијата на законските обврски.
Од Комисијата за еднакви можности порачуваат дека остануваат посветени на унапредување на политиките и законските решенија за поголема заштита и еднаквост на жените. Од друга страна, СЗО најавува продолжување на соработката со институциите и партнерите од ОН за зајакнување на координираниот одговор, со цел да се обезбеди систем кој ќе ја препознае, заштити и поддржи секоја жена.