Група измамници во италијанскиот регион Тоскана фалсификувале и пуштиле во оптек десетици илјади монети од две евра. Експертите ги опишаа овие фалсификати како исклучително успешни и многу опасни за економијата, бидејќи е речиси невозможно да се разликуваат од вистински пари.
Група измамници во италијанскиот регион Тоскана фалсификувале и пуштиле во оптек десетици илјади монети од две евра. Експертите ги опишаа овие фалсификати како исклучително успешни и многу опасни за економијата, бидејќи е речиси невозможно да се разликуваат од вистински пари.
Главни осомничени се тројца кинески државјани на возраст од 37, 47 и 51 година. Тие нелегално увезувале компоненти за изработка на монети, никел и легура од никел-месинг, од Кина преку Германија и Белгија. Потоа монетите биле составени и завршени во две тајни работилници во тосканската општина Кварата.
По производството, лажните пари ги ставале во коцкарници (казина) или ги вметнувале во менувачници за да добијат вистински хартиени банкноти за нив. На овој начин, најмалку 20.000 монети од две евра се пуштени во оптек од ноември минатата година.
Она што особено ги загрижувало истражителите бил врвниот квалитет на производството. Фалсификатите имале речиси идентични безбедносни карактеристики како и вистинските монети, вклучувајќи тежина, димензии и магнетни својства. Италијанскиот весник „Ил Фато Квотидијано“ пишува дека овие лажни монети се „скоро непрепознатливи“, дури и за експертите во Европската централна банка (ЕЦБ).
Како што објавува новинската агенција АНСА, сторителите детално ги копирале и националните мотиви на неколку земји-членки на еврозоната што се наоѓаат на задната страна од монетите, вклучувајќи ги мотивите на Франција, Словенија, Грција, Белгија и Луксембург.
Италијанската полиција уапсила тројца Кинези и им одредила притвор, додека уште две лица, исто така кинески државјани, се под истрага и се бранат од слобода. Сите се соочуваат со сериозни обвиненија за криминално здружување и фалсификување пари. Осомничените се дел од голема кинеска заедница што живее во блискиот град Прато, каде што најчесто работат во локалната текстилна индустрија.
За време на рацијата во тајните работилници, полицијата конфискувала голема количина суровина за производство на биметални монети, две индустриски преси, машина за виткање и специјална машина за назабеност на рабовите на монетите.
Според податоците објавени од списанието „Фокус“, фалсификатите од две евра се убедливо најчести меѓу фалсификуваните монети на заедничката европска валута, сочинувајќи дури 96 проценти од сите запленети фалсификувани монети. По нив, криминалците најчесто фалсификуваат монети од едно евро и 50 центи.