Министерството за внатрешни работи информира дека со брза и координирана реакција на полициските службеници бил приведен 48-годишен жител на Велес осомничен за семејно насилство врз сопругата и малолетната ќерка.
Според информациите од МВР, на 29 мај околу 11:40 часот во СВР Скопје било пријавено од очевидец дека на подрачјето на Општина Центар маж физички ја нападнал својата сопруга. Веднаш по пријавата биле преземени мерки за пронаоѓање на сторителот и заштита на жртвата.
Со полициските проверки било утврдено дека станува збор за лица од Велес, по што во потрагата и постапувањето се вклучиле и полициски службеници од СВР Велес.
Откако Џ.Б. (48) заедно со својата 43-годишна сопруга се вратиле во семејниот дом, тој повторно извршил физички напад врз сопругата и нивната малолетна ќерка, при што им упатувал закани со остар предмет.
Благодарение на брзата реакција на полицијата, осомничениот бил лишен од слобода во 21 часот. Остриот предмет бил пронајден и одземен, а лицето е задржано во полициска станица.
За случајот биле известени јавен обвинител и Центарот за социјални работи во Велес, а по целосното документирање на настанот ќе биде поднесена соодветна кривична пријава.
Од МВР упатуваат апел до граѓаните веднаш да пријавуваат случаи на семејно насилство, без разлика дали се жртви или сведоци, со цел навремена реакција и обезбедување заштита на загрозените лица, објави Скопје1.мк