Претседателот на Владата, Христијан Мицкоски, денеска присуствуваше на свеченото отворање на нов шопинг-центар „Mega Shopping Park“ во Гевгелија. Во своето обраќање, премиерот истакна дека овој капитален објект нуди импресивни содржини и очекува да прерасне во значајна точка за сите патници кои транзитираат низ државата.
Мицкоски посочи дека објектот „Mega Shopping Park“ сè уште не е целосно пуштен во употреба во својот полн капацитет. Од неформалните разговори со сопствениците, тој најави дека на локацијата дополнително ќе се отвораат нови продажни места.
„На Коридорот 10 кај нас во Македонија ова ќе претставува навистина едно преубаво место каде што ќе можат сите оние туристи и патници кои ќе транзитираат низ нашата земја да застанат овде, да одморат, а зошто да не и да купуваат и да пазаруваат“, изјави премиерот, потсетувајќи дека недалеку од објектот годишно поминуваат околу десетина милиони луѓе.
Партнерство меѓу локалната власт и бизнис секторот
За време на посетата, претседателот на Владата упати благодарност до градоначалникот на Општина Гевгелија за континуираната поддршка што локалната самоуправа му ја давала на инвеститорот во текот на реализацијата на целата инвестиција на „Mega Shopping Park“.
Мицкоски се заблагодари и на самите инвеститори за нивната одлука да вложат во овој проект, потенцирајќи ја меѓусебната поврзаност на приватниот сектор и државата.
„Колку повеќе вреди вашиот бизнис и колку е тој поголем, толку државата станува посилна. Тоа е една двонасочна улица“, нагласи премиерот, додавајќи дека очекува овој проект да донесе директна додадена вредност за економијата во Гевгелија.