Албанскиот премиер Еди Рама вчера зборуваше во интервју за Си-Ен-Ен за контроверзниот проект Звернец, во кој е вклучен зетот на Доналд Трамп, Џаред Кушнер. И поради кој веќе неколку дена има големи протести во Албанија. Проектот е изградба на ликсузент ресорт на подрачје кое е важен природен резерват и живеалиште на фламинга.
Интервјуто беше жестоко, а Рама се судри со водителката Иса Соарес, која постојано го прашуваше за проектот, додека премиерот велеше дека нема проект и дека ова се лажни вести.
Еди Рама: Слушајте, ви благодарам што го покажавте тоа видео, бидејќи тоа е токму портретот на некој што е дезинформиран или дел од оние што дезинформираат. Бидејќи, пред сè, нема проект. Тој зборува за проект што не го видел никаде на друго место освен во лажни слики креирани и дистрибуирани на социјалните мрежи во Албанија, бидејќи сме во хибридна војна.
Што се однесува до проектот…
Новинарката Соарес: Значи, само да разјаснам, проектот нема да продолжи?
Рама: Повторно, сè уште нема проект. Нема проект.
Новинарката: Сакам да ве слушам, господине премиере, но се обидувам да разјаснам…
Рама: Дали сакате да ме слушате или само сакате да разговарате?
Новинарката: Сакам да ве слушам, но се обидувам да разјаснам за нашите гледачи. Нè обвинувате за лажни вести, а јас се обидувам да разберам дали проектот продолжува или е запрен. Бидејќи, според извештаите на „Политико“, Специјалното обвинителство за борба против корупцијата во Албанија започна истрага за овој проект. Како може проектот да продолжи под овие услови?
Рама: Повторно, не сакате да слушате. Ми е многу јасно. Не ве напаѓам. Ви ја кажувам вистината. И додека не ми го покажете проектот, мора да ме слушате, бидејќи нема проект.
За да го создаде овој проект, групата, која ја сочинуваат не само Џаред Кушнер и Иванка Трамп, туку и други високо почитувани инвеститори, ангажираше пет од најдобрите архитекти во светот денес:
Кенго Кума од Јапонија, Бјарке Ингелс од Данска, Емре Аролат од Турција, К-Студио од Грција, Жан Нувел од Франција.
Тие работат заедно со врвни инженери за животна средина и специјалисти за социјално влијание. Една од најголемите консултантски компании е исто така ангажирана за проценка на влијанието врз животната средина.
Бидејќи предизвикот не е да се изгради град. Предизвикот не е да се истура бетон врз главите на фламингата. Предизвикот е да се докаже дека развојот и природата не само што можат да коегзистираат, туку дека природата и развојот се потребни едни на други.
Луѓето заслужуваат да живеат во поинаква средина, каде што можат да уживаат во природата и во исто време да ѝ покажат почит.
Значи, проектот сè уште не постои. Проценката на влијанието врз животната средина сè уште се спроведува. Разбирате ли?
И дозволете ми да завршам?
Новинарката: Ве слушам, господине премиере.
Рама: Дозволете ми да завршам, бидејќи го споменавте „Политико“ и рековте дека постои истрага против корупција. Ова се лажни вести. Истрагата е за еден од сопствениците на земјиштето. Тоа е приватно земјиште и еден од сопствениците го продал имотот, кој е купен преку целосно транспарентни банкарски трансакции.
Истрагата е за тоа прашање. Не е за инвестицијата. Не е за проектот. Не е за Кушнер. Не е за Трамп. Не станува збор за ништо од она што се додава во оваа мешавина за да се создаде сензационална вест дека Албанија е место каде што убиваме фламинга.