Министерот за здравство, Азир Алиу, од Рига порача дека малите држави можат да бидат лидери во примената на иновативни и дигитални решенија во здравствените системи и покрај ограничените ресурси и предизвиците со кои се соочуваат.
Алиу учествува на дванаесеттиот состанок на високо ниво на Иницијативата за мали земји на Светската здравствена организација, што се одржува во Рига. Главна тема на дводневниот собир е како малите европски држави да создадат одржливи и иновативни решенија за здравствените системи во услови на недостиг на кадар, стареење на населението и зголемени потреби на пациентите.
„Малите земји не секогаш имаат најголеми ресурси, но можат да имаат најбрза адаптација, најдобра координација и најсилна политичка волја за промени. Нашата цел е да изградиме здравствен систем кој подобро го користи знаењето на здравствените работници, го намалува административниот товар и им овозможува повеќе време за пациентите“, истакна Алиу.
Во рамки на сесијата посветена на оптимизацијата на здравствената работна сила, министерот ја претстави Националната стратегија за дигитално здравство 2026–2030 како еден од клучните реформски процеси во земјата. Тој нагласи дека дигитализацијата не претставува само технолошка модернизација, туку средство за подобра организација на здравствениот систем и поквалитетна грижа за пациентите.
Алиу ги претстави и активностите што Министерството за здравство ги презема во наредниот период, меѓу кои се воведување дигитализирани патеки на лекување, приоритетно упатување и тријажа, развој на мултидисциплинарни тимови и пилот-проект за теледерматологија, со цел специјалистичките услуги да станат подостапни за жителите во руралните и оддалечените средини.
Тој се осврна и на новиот Закон за евиденциите во здравството, кој треба да придонесе за усогласување со европските стандарди за управување со здравствените податоци, како и на унапредувањето на националниот регистар на здравствени работници.
На панелот посветен на дигиталната технологија и вештачката интелигенција, Алиу порача дека вештачката интелигенција може значително да помогне во модернизацијата на здравството, но не смее да ја замени човечката одговорност и професионалната проценка на здравствените работници.
Учеството на министерот во Рига е дел од активностите за продлабочување на соработката со европските здравствени институции и размена на искуства за примена на современи решенија што треба да ја зголемат ефикасноста и одржливоста на здравствениот систем во земјата.