Комисијата за култура на СДСМ упати остри критики и обвинувања до власта, тврдејќи дека државните институции свесно дозволиле еден од најзначајните идентитетски и историски комплекси во земјава да премине во приватни раце без институционална заштита.
Од партијата изразија сериозна загриженост и револт во јавноста поради информациите дека:
„…државните институции дозволиле еден од најзначајните споменици на културата во државата, Арабати баба-теќе во Тетово – да биде продаден како обичен угостителски објект, наместо да биде заштитен како културно наследство од највисок ранг“.
Опозицијата директно ги лоцира пропустите кај две клучни институции кои биле должни да реагираат во ваква ситуација.
„Особено загрижува фактот што надлежните институции, пред сè Управата за заштита на културното наследство и Министерството за култура, не презеле никакви мерки за државата да го откупи и зачува овој исклучително вреден споменик. Наместо тоа, дозволиле културно добро од непроценливо историско значење да стане предмет на пазарна трансакција“, се вели во партиското соопштение.
Сомнежи за законските процедури и улогата на Општина Тетово
СДСМ јавно го отвори прашањето за легалноста на целиот процес, прашувајќи како е можно објект со статус на заштитено културно наследство воопшто да се третира како комерцијален имот. Според нив, дополнителен скандал претставува улогата на локалната самоуправа по завршувањето на купопродажбата.
„Уште поскандалозно е што по извршената купопродажба, Советот на Општина Тетово одобрил враќање на данокот платен при трансакцијата. Со тоа се создава впечаток дека институциите не само што не го заштитиле културното наследство, туку дополнително интервенираат во корист на веќе реализирана приватна трансакција. Арабати баба-теќе не е обичен имот. Тоа е споменик на културата од исклучително значење, дел од мултикултурното и духовното наследство на Македонија, стар речиси пет века“, реагираат од Комисијата за култура.
Опозицијата излезе со четири итни барања до надлежните
Поради сериозноста на случајот, од СДСМ побараа итно постапување на ресорите и целосно обелоденување на случајот пред македонската јавност. Во соопштението се наведени следните официјални барања:
-
Министерството за култура и Управата за заштита на културното наследство итно да ја информираат јавноста дали биле известени за продажбата и какви мерки презеле.
-
Да се објави целокупната документација поврзана со купопродажбата.
-
Да се утврди дали биле испочитувани законските обврски што произлегуваат од статусот на објектот како заштитено културно наследство.
-
Да се изготви план за трајна заштита и зачувување на комплексот како национално културно богатство.
На крајот од своето соопштение,Комисијата за култура на СДСМ потсетува дека државата има уставна и законска обврска будно да го штити, а не пасивно да го набљудува отуѓувањето на историското богатство, порачувајќи дека:
„Културното наследство не смее да биде жртва на институционална негрижа, политички калкулации или имотни интереси“.