Премиерот и претседател на владејачката ВМРО-ДПМНЕ, Христијан Мицкоски денеска изјави дека ВМРО-ДПМНЕ прво ќе го одбележи роденденот на партијата, а потоа ќе започнат разговори за реконструкцијата на Владата.
„Следната недела, по роденденот што ќе биде на 17 јуни во Струмица со почеток од 20 часот на стадионот, после тоа, следниот ден, почнуваме разговори со владините коалициски партнери околу реконструкцијата на Владата“, изјави Мицкоски.
Мицкоски рече дека неговата партија сака редовни парламентарни избори, но додаде дека ако биде предизвикана ќе оди на предвремени избори и ќе победи.
Тој ги коментираше тврдењата на опозицискиот СДСМ дека ќе се оди на избори бидејќи Владата ги потрошила државните парите.
„Нема да се мешам во нивната стратегија. Само знам дека, зборувам политички, кога влегувате во втората половина од мандатот, логично е да сте подготвени за избори без разлика дали се тоа редовни или вонредни, на барање на опозицијата. Еве нашата опозиција не бара, нашата опозиција е сокриена, има три-четворица кои држат прес-конференции полни со невистини и навреди, најчесто кон мене. И сега кога имаат можност да се покажат на терен, да видат еве колку ефект имаат тие нивни невистини и навреди кон мене, тие едноставно бегаат. Тоа нема да биде првпат што го прави СДСМ. Тоа веќе во историјата многу пати го направила СДСМ“, рече Мицкоски.
Извор: 360stepeni.mk