СДСМ преку соопштение јавно праша колку средства биле потрошени за прославата на ВМРО-ДПМНЕ во Струмица и побара одговор од власта за трошоците поврзани со организацијата на настанот.
Од опозициската партија прашуваат дали прославата ги чинела граѓаните 300.000 евра, 500.000 евра или уште повеќе, посочувајќи ги трошоците за автобуски превоз, ангажирање на вработени од јавната администрација и други организациски активности.
„Колку ги чинеше тоа граѓаните? Како да го донеле Дејвид Гета?“, прашуваат од СДСМ.
Од партијата оценуваат дека додека граѓаните се соочуваат со раст на цените, зголемена сиромаштија и економски предизвици, власта организира прослави наместо да се фокусира на решавање на проблемите.
Според СДСМ, нема доволно средства за повисоки плати, субвенции за земјоделците, зголемување на минималната плата, поддршка за младите, лекови и други мерки од јавен интерес, додека, како што наведуваат, се трошат средства за партиски активности и тендери.
„Колку платија граѓаните за Мицкоски да ги слави неуспесите и извештајот на Европскиот парламент за изолацијата на Македонија?“, прашуваат од СДСМ.
Од партијата бараат транспарентност и јавно објавување на сите трошоци поврзани со организацијата на прославата во Струмица.