Премиерот Христијан Мицкоски денес реагираше дека Бугарија преку дипломатска нота открила јавно дека неговата сопруга и едниот од двата сина три дена минале во Пампорово и дека со тоа им ја загрозиле безбедноста. За ова, рече премиерот, ќе биде информирана НАТО алијансата.
– Вчера видовме еден преседан во дипломатијата кога излезе една дипломатска нота за тродневен престој на мојата сопруга со мојот помал син кај наши пријатели во Пампорово, нешто што е невообичаена пракса во светот на дипломатијата и можеби единствена, рече тој денеска како одговор на новинарско прашање.
Мицкоски додаде дека и дипломатските ноти кои ги има Македонија за бугарските политичари може да бидат интересни за јавноста.
– Второ, јас за ова веќе ги информирав партнерите од НАТО, бидејќи со ова вадење на оваа дипломатска нота се загрозува безбедноста на моето семејство, на кое му се извинувам што треба ова да го трпат, додаде Мицкоски. (Faktor.mk)