Роланд Вајсман, попознат во пошироката јавност и како генерален директор на австриската радиотелевизија ОРФ, поднесе неотповиклива оставка откако се прошири приказната дека сексуално злоупотребувал колешка.
Се чини дека оваа Евровизија е едноставно проследена со негативна енергија… Откако дури шест земји се откажаа од овогодинешната Евровизија поради, како што наведоа, политичката ситуација во која на Израел му е дозволено да учествува на натпревар што промовира еднаквост и мир, низ медиумскиот простор се прошири веста за сексуалниот скандал на генералниот директор на австриската телевизија.
Роланд Вајсман, генералниот директор на австриската радиотелевизија ОРФ, е обвинет за сексуално злоупотребување на еден од вработените во телевизијата.
Според пишувањето на австрискиот „Куриер“ и на другите австриски медиуми, Вајсман наводно бил обвинет за несоодветно однесување уште на почетокот на неговиот мандат во 2022 година.
Адвокатот на Вајсман, Оливер Шербаум, објаснил дека директорот уште тогаш ги негирал обвинувањата и дека не следела никаква суштинска верификација на обвинувањата.
– Мојот клиент до денес не ги добил точните факти за што станува збор, која ги изнесе вработената. И покрај ова, за да ја избегне штетата на компанијата, тој беше подготвен да направи далекусежни отстапки, па затоа и поднесе оставка од функцијата главен директор на ОРФ, со моментално дејство, од неделата 8 март 2026 година во 11:45 часот – објаснил адвокатот Шербаум.
Исто така, адвокатот истакнал дека јавното изнесување на обвинувањата пред тие целосно да бидат истражени било „прекумерно и непропорционално“, а додал и дека личните права на Вајсман биле прекршени, поради што најавил и можни правни чекори.
Иако официјално не е потврдено дека станува збор за новинарката Соња Загмајстер, некои медиуми како што е „Хојте“ се убедени дека станува збор за Загмајстер.
– Денеска за мене е посебен ден – напишала Соња Загмајстер на својот профил на социјалната мрежа Икс.
Како што објаснила, Вајсман лично ја отпуштил двапати поради тоа што се спротивставила на злоупотребите, како што се „нарачани интервјуа“ и „омразата на мажите“. Покрај тоа, тврди дека Вајсман фаворизирал „специфичен тип на личност и тип на маж“, а дека „храбрите жени“ биле напаѓани и понижувани.