Антикорупцискиот тим (АКТ) на СДСМ денеска преку прес-конференција обвини за нов, милионски скандал со јавни набавки, тврдејќи дека власта предводена од ВМРО-ДПМНЕ континуирано доделува тендери на свои „омилени“ компании.
Според членот на Извршниот одбор на партијата, Јон Фрчкоски, станува збор за фирмата „МАСТЕФ ДООЕЛ“, која, како што тврдат од опозицијата, досега добила дури 93 тендери чија вкупна вредност надминува 18,3 милиони евра.
„Шемата е добро позната и разработена. Ова е корупциски систем во кој едни исти фирми добиваат сè. На локално ниво. На централно ниво. Во институциите, општините, сите раководени од кадри на ВМРО-ДПМНЕ“, изјави Фрчкоски, обвинувајќи дека на овој начин бездушно се испумпуваат парите на граѓаните.
Од СДСМ посочуваат дека најголемите суми за оваа компанија се реализирани во Скопје, потенцирајќи дека истата фирма го добила и последниот тендер поврзан со Луна паркот. Во тој контекст, Фрчкоски упати критики до градските власти, обвинувајќи дека додека ѓубрето во Скопје стои неисчистено, „на големо се чистат парите на граѓаните“.
Во своето обраќање, претставникот на СДСМ ја обвини Владата дека додека тврди оти нема пари за повисоки плати, пензии и антикризни мерки, дели милиони на фирми блиски до нив. Според оценките на опозициската партија, отсуството на реформи и стагнацијата на патот кон ЕУ се намерни.
„Колку повеќе сме далеку од Европа, толку повеќе простор има за местење тендери, за богатење на блиски фирми и за организиран грабеж на државата“, се наведува во партиското обвинување.
На крајот од прес-конференцијата, СДСМ објави документи и директно го повика Јавното обвинителство да постапи по овие сознанија.
Од партијата прашуваат до кога институцијата ќе молчи и дали „обвинителот чека насоки по телефон од премиерот Мицкоски“. Од СДСМ порачаа дека ќе продолжат да ги разобличуваат сите тендери и криминални шеми.