Прогресот на автопатите на Коридорот 8 се одвива според планираното и тие ќе бидат изградени во предвидениот рок до 2029 година. Ова го истакна вицепремиерот Александар Николоски во интервју за ТВ Сител, најавувајќи дека веќе следната година ќе биде пуштена за сообраќај една лента од новиот автопат на делницата Прилеп-Битола.
Во интервјуто, Николоски посочи на конкретен проблем со десетина сопственици на вили во прилепското село Ореовец, кои, како што рече, го блокираат пристапот до наоѓалиштето од каде што треба да се црпи материјал за изградба на автопатот. Во тој контекст, тој упати и директна критика до политичката партија Левица.
„Единствено останува со овие буџованиве од Ореовец да го решиме проблемот. Има таму десетина сопственици на вили, кои што блокираат пристап до наоѓалиштето… Мирот им се нарушува, веројатно кога слушаат таму пријатна музика и кога поминуваат камионите, но тоа нарушување на мир чини некаде околу стотина милиони евра“, изјави Николоски.
Вицепремиерот јавно праша зошто партијата Левица ги штити овие сопственици: „Гледам политичката партија Левица се залепи на ова, па фер е да ги прашаме како дефинирани левичари, како тоа сака државатa да потроши 100 милиони евра повеќе. Секако дека ќе решиме, но ова се добри морални прашања кои што се отвораат“.
Осврнувајќи се на останатите автопатски делници, Николоски информираше дека трасата Тетово-Гостивар, иако навидум изгледа како најлесна, во суштина е најтешка поради големиот број објекти што треба да се дислоцираат. Од друга страна, за делницата Гостивар-Букојчани, која го заобиколува превојот Стража, тој нагласи дека прогресот е добар и веќе се пробиени 18 километри.
На крајот, вицепремиерот заклучи дека автопатот Прилеп-Битола е најдолгиот автопат што поединечно се гради во државата и дека Владата става голем фокус на овој проект. Тој изрази уверување дека сите три автопатски делници (Тетово-Гостивар, Гостивар-Букојчани и Прилеп-Битола) ќе бидат целосно завршени во рамките на предвидениот рок.