Патниците што ги користат железничките линии кон Велес, Битола и Гевгелија ќе треба привремено да бараат алтернативен превоз, бидејќи од 22 јуни до 1 јули ќе бидат укинати повеќе патнички возови низ државата.
Од Јавното претпријатие ЖРСМ Инфраструктура информираат дека прекинот е поради изведување на завршните градежни работи на делницата Скопје – Зелениково, во рамките на проектот „Градски воз“.
Во наведениот период нема да сообраќаат возовите на релација Скопје – Гевгелија со броеви 611 и 631, како и возовите од Гевгелија кон Скопје со броеви 630 и 632.
Прекин ќе има и на линиите Скопје – Битола, каде што се укинуваат возовите 641 и 645, како и возовите 640 и 644 во спротивен правец.
Без сообраќај ќе останат и возовите на релација Битола – Велес и Велес – Битола со броеви 642 и 643, како и линиите Скопје – Велес (2083) и Велес – Скопје (600).
Од претпријатието апелираат до граѓаните навреме да ги планираат своите патувања и да ги земат предвид измените во возниот ред додека траат градежните активности на железничката инфраструктура.