13
Една нова студија ја открива загрижувачката вистина за воздухот што го дишеме во затворени простори. Според научниците, повеќе од 70.000 честички микропластика можат да навлезат во нашите бели дробови секој ден, што е значително повеќе отколку што досега се веруваше. Она што е уште повознемирувачко е фактот дека повеќето од овие честички се доволно мали за да навлезат длабоко во ткивото на белите дробови, пишува ScienceAlert.
Пластиката стана еден од горливите еколошки проблеми на нашето време, загадувајќи сѐ, од водните патишта до нашите крвни садови. Овие ситни честички не ги внесуваме во телото само со храната и пијалоците, туку и со воздухот што го дишеме.
Француска студија открива алармантни бројки
Научниците од Универзитетот во Тулуз, Франција спровеле студија за прецизно мерење на количината на пластична прашина што ја вдишуваме. Тимот анализирал 16 примероци од воздух од станови и автомобили, користејќи ја техниката Раманска спектроскопија.
Резултатите биле изненадувачки. Просечната концентрација во становите изнесувала 528 честички микропластика на кубен метар, додека кај автомобилите оваа бројка скокнала на неверојатни 2.238 честички. Дури 94 отсто од овие честички биле помали од 10 микрометри, што им овозможува да навлезат длабоко во белите дробови.
100 пати повеќе од претходните проценки
Врз основа на овие податоци, тимот проценил дека возрасно лице вдишува околу 71.000 честички микропластика дневно во затворен простор, од кои 68.000 се помали од 10 микрометри.
„Количеството што го откривме е 100 пати поголемо од претходните екстраполирани проценки“, велат авторите на студијата. „Луѓето поминуваат во просек 90 отсто од своето време во затворени простории, вклучувајќи ги домовите, работните места, продавниците, превозот итн., и за сето тоа време се изложени на микропластично загадување преку вдишување без воопшто да размислуваат за тоа“.
Кои се последиците по здравјето?
Иако сѐ уште не е јасно што точно му прави микропластиката на нашето тело, научниците се сомневаат дека последиците воопшто не се безопасни. Неодамнешните истражувања ја поврзаа изложеноста на микропластика со зголемениот ризик од одредени видови на рак, проблеми со плодноста, мозочни удари и низа други здравствени проблеми.
Затоа, итно е потребно дополнително истражување за да се утврдат биолошките ефекти на овие честички, но и да се најдат начини за намалување на изложеноста. Студијата е објавена во списанието PLOS One.