14
Високиот претставник на ЕУ за надворешни работи и безбедносна политика, Каја Калас, денес изјави дека „проширувањето не е природен процес, туку геополитички императив“, додавајќи дека во позадина на геополитичките промени е потребно Унијата да дејствува со еден глас, поради што инсистира на усогласување со заедничката надворешна и безбедносна политика на ЕУ.
Зборувајќи на панел на Европската комисија посветен на проширувањето, Калас истакна дека важноста на процесот на проширување на ЕУ мора да се доближи до граѓаните на земјите-членки на ЕУ.
„Ова не е важно само за земјите што сакаат да се приклучат кон ЕУ, туку и за нас. Станува збор за надминување на физичките пречки во Европа, зајакнување на демократијата и намалување на влијанието на автократиите“, нагласи Калас.
Високиот претставник на ЕУ, исто така, нагласи дека светот е во период на длабоки геополитички промени и дека е клучно ЕУ да дејствува со еден глас.
„Светскиот поредок очигледно се менува и промените се неизбежни. Затоа бараме усогласување на земјите-членки со заедничка надворешна и безбедносна политика. Ова покажува дали ги делиме истите мисли и вредности во овој конкурентен свет“, додаде високиот претставник на ЕУ.
Калас предупреди дека во самата Унија постојат разлики во перцепцијата на прашањата од надворешната политика, што го намалува влијанието на ЕУ.
„Кога не сме обединети, ја губиме политичката моќ што треба да ја имаме. Затоа е клучно единството, да се зборува со еден глас на мултилатералните форуми, да се гледаат заканите и партнерите на ист начин, да се градат сојузи врз заеднички вредности“, заклучи високиот претставник на ЕУ.
Целта на Форумот за проширување на Европската Унија, насловен како „Заокружување на Унијата и зајакнување на нашата иднина“, е да го подигне дијалогот за проширување на повисоко ниво како заеднички политички, социјален и генерациски проект, беше објавено на веб-страницата на Европската комисија.
Ова е првото издание на Форумот на Европската комисија за проширување на ЕУ, според веб-страницата на ЕК, додавајќи дека се одржува во време кога проширувањето доби нов импулс како двигател на стабилност, просперитет и демократски реформи низ целиот континент.