5
Рускиот феминистички панк бенд „Pussy Riot“, познат по своите настапи против режимот на Владимир Путин, денес беше окарактеризиран во московскиот суд како „екстремистичка организација“, што значи дека активностите на групата во Русија се забранети.
Пресудата е донесена без присуство на јавноста, на барање на Обвинителството, објавува Ројтерс.
Членките на бендот, кои со години се во егзил, често зборуваат против војната на Русија во Украина, а во септември беа осудени во отсуство на затворски казни до 13 години за, како што се наведува во пресудата, изнесување лаги за руската војска.
Членките на бендот беа етикетирани како „странски агенти“, а претходно ги негираа сите обвиненија, наведувајќи дека се политички мотивирани.
Денешната пресуда, според Ројтерс, која ја дели ознаката како „екстремистичка организација“ со Јеховините сведоци или политичката организација на покојниот опозициски лик Алексеј Навални, ќе им олесни на властите да ги гонат поддржувачите на бендот во Русија или луѓето кои соработувале со нив во минатото.
Во образложението за барањето за прогласување на „Pussy Riot“ за екстремистичка организација, обвинителството наведе неколку нивни активности што ги смета за закана за државната безбедност, вклучувајќи го и музичкиот протест на групата против Путин во московска црква во 2012 година, што им донесе глобална популарност.
Адвокатот на бендот, Леонид Соловјов, неодамна изјави, како што објави Тасс, дека сите дејствија на „Pussy Riot“ биле иронични и дека нивната цел не била да го нарушат уставниот поредок.