2
Словенија ќе „поддржи какво било решение кое би можело да доведе до прекин на војната во Украина“, но ќе го почитува ставот на Белгија, изјави денес словенечкиот премиер Роберт Голоб, цитиран од Ројтерс. Голоб додаде дека замрзнатите руски средства се најсилната алатка што Европската Унија ја има на располагање за да ја постигне оваа цел.
Европската комисија предложи да се користат замрзнати средства на руската централна банка, кои претежно се чуваат во белгиска клириншка куќа, за да се обезбеди огромен заем за Киев, потсетува Ројтерс. Сепак, Белгија е длабоко загрижена за правните и финансиските ризици.
Словенија ќе ги земе предвид загриженостите на Белгија и нема да поддржи какво било решение што Белгија го отфрла, рече Голоб пред самитот на ЕУ во Брисел. Според неговите зборови, цитирани од ТАСС, земјата ќе учествува во обезбедувањето безбедносни гаранции за Киев само ако добие мандат од Обединетите нации.
„Веруваме дека само ОН може да биде единствениот гарант на мирот. Само во овој случај, кога ќе се постигне мир и кога мировните сили ќе дејствуваат под мандат на ОН, само тогаш ќе учествува Словенија, во секој друг случај – не“, одговори Голоб на новинарско прашање за можноста за испраќање словенечки трупи во Украина.
Словенечкиот премиер, исто така, истакна дека „конкретни чекори кон мирот“ во Украина не можат да се постигнат без директни преговори со Русија.
Москва се спротивставува на присуството на трупи на НАТО во Украина, според ТАСС. На 21 август, рускиот министер за надворешни работи Сергеј Лавров нагласи дека давањето гаранции за безбедноста на Украина преку „странска воена интервенција во кој било дел од украинската територија“ би било неприфатливо за Русија.