18
Белгиската министерка за азил и миграција разгледува „секое можно решение“ за зголемување на бројот на нелегални мигранти што се протеруваат од Белгија, вклучително и изнајмување простор во затворите во странство за сместување на странски затвореници.
Во интервју за „Еуроњуз“ во Брисел, Анлин Ван Босујт изјави дека Белгија сака да смести странски затвореници во странство како дел од своите антимиграциски мерки и е отворена за партнерства со земјите од Западен Балкан и пошироко.
Белгиската министерка неодамна ги посети Албанија и Косово за да ја истражи можноста за изнајмување простор во затворите за сместување на нелегални мигранти осудени за кривични дела во Белгија.
„Разгледуваме секое можно решение за зголемување на стапката на враќање. Тоа е една од опциите што ги дискутираме со Министерството за правда“, рече Ван Босујт.
Таа објасни дека целта на разговорите со Албанија е да се сместат граѓаните на земјата кои се во белгиските затвори, додека во Косово белгиската влада сака да смести „луѓе кои нелегално престојуваат во Белгија и кои се во нејзините затвори“ без оглед на националноста.
„Еуроњуз“ потсетува дека данската влада веќе тестира таков план со испраќање на странци на кои им е наредено да ја напуштат земјата во Косово за да ги отслужат своите казни, а потоа, како што се очекува, да бидат вратени во нивните земји на потекло.
Според бриселскиот портал, Западниот Балкан се појави како регион што треба да се истражи за она што ЕУ го опишува како „иновативни решенија“ за миграцијата.
Италија веќе ги отвори своите први центри за притвор на мигранти во Албанија минатата година, но постојат правни загрижености за нив и тие беа критикувани од бранителите на човекови права.
Ван Босујт нагласи дека Белгија е отворена за истражување партнерства надвор од Западен Балкан.
„Бевме таму (во Албанија и Косово), разговаравме со надлежните министри, но може да има и други можности или земји“, рече министерката. „Но, важно е да се види каде можеме да сметаме на такво решение“, додаде таа.
На прашањето дали владата би разгледала слични решенија за мигрантите кои нелегално престојуваат во Белгија и не се осудени за кривични дела, Ван Босујт рече дека Белгија би можела да ги истражи можностите за нов договор со ЕУ што би им дозволил на земјите-членки да испраќаат мигранти во таканаречени „центри за враќање“ во земји надвор од ЕУ.
Предлогот, кој е дел од напорите на ЕУ за забрзување на враќањето на нелегалните мигранти, би можел да доведе до тоа луѓето чии барања за азил се одбиени да бидат вратени во центри во земји со кои немаат врски, но кои ЕУ ги смета за безбедни.