8
Американскиот претседател Доналд Трамп изјави дека е „многу разочаран“ од британскиот премиер Кир Стармер затоа што го блокирал да ја користи базата Диего Гарсија за извршување напади врз Иран.
Американскиот претседател изјави за британскиот Телеграф дека првичното одбивање на премиерот да им дозволи на американските сили да ја користат базата на архипелагот Чагос е без преседан во односите меѓу двете земји.
Велика Британија ѝ одби на Америка дозвола да извршува напади од бази како што се Диего Гарсија и базата на Кралските воздухопловни сили Ферфорд, повикувајќи се на меѓународното право. Сепак, премиерот попушти во неделата вечерта и рече дека ќе им дозволи на САД пристап до Диего Гарсија за „специфични и ограничени одбранбени цели“.
Трамп изјави дека на Стармер „му требаше премногу време“ да се предомисли. „Тоа веројатно никогаш порано не се случило меѓу нашите земји“, изјави тој за Телеграф, додавајќи: „Се чинеше дека е загрижен околу легалноста“.
Спорот со Диего Гарсија го наведе претседателот да ја повлече поддршката за контроверзниот договор Чагос на Стармер, со кој суверенитетот над територијата во Индискиот Океан ќе му се предаде на Маврициус, а потоа Британија ќе ја изнајми воената база.
Трамп за Телеграф изјави: „Одеднаш Маврициус бара сопственост. Требаше да се борат за него и да го задржат или да ги натераат да го земат, ако ја сакате вистината. Но, не, бевме многу разочарани од Кир (Стармер).“
Два дена откако САД започнаа напади врз Иран, Трамп изјави дека операцијата била „многу пред предвидениот рок“.
„Има луѓе без раце и без нозе и лица кои се разнесени. Иран е одговорен за 95 проценти од тоа. Овие ужасни настани беа предизвикани од Иран“, изјави Трамп, без да именува конкретни случаи.
Трамп изјави за Телеграф дека договорот за Чагос е „многу воук работа“. „Правно ќе беше многу подобро ако само го задржаа сопствеништвото над територијата, а не да им ја дадат на луѓе кои не се законски сопственици“, рече тој.
Осврнувајќи се на пресвртот на Стармер во врска со Диего Гарсија, тој додаде: „Корисно е. Траеше предолго. Предолго.“
Во недела навечер Кир Стармер им дозволи на САД да користат британски воени бази за напад врз Иран. Стармер се соочува и со критики од републиканците во Вашингтон за доцнењето.
Еден час откако премиерот објави дека дал дозвола на САД да ги користат базите, иранскиот камиказа дрон „Шахед“ ја погоди британската база на кралските воздухопловни сили во Акротири на Кипар.
Британските војници беа предупредени за „безбедносната закана“ и им беше кажано да се засолнат бидејќи се слушаа експлозии во областа Лимасол, каде што се наоѓа базата. Немаше жртви, но Министерството за одбрана оттогаш ги пресели семејствата на војниците подалеку од базата.