22
„Оваа посета нема никаква врска со било какви измислени аранжмани за кои пишуваат сараевските портали. Оваа посета е за нив ‘купена’, токму како што се за нив купени и сите други успеси кои Република Српска ги остварува во последните години – од политички до економски“, изјави Додик.
Додик за „Срна“ истакна дека денешната посета на синот на американскиот претседател Доналд Трамп Бања Лука е „резултат на долгорочната работа на Република Српска на градење односи, доверба и сојузништва со луѓе и адреси кои во светот застапуваат политика на здрав разум“.
„Тоа е политика која се темели на едноставната вистина – дека за нашиот народ и нашата иднина не може да одлучува никој друг освен српскиот народ и дека тоа е право кое го дели со остатокот од цивилизираниот свет“, порача организацискиот секретар на СНСД.
Тој нагласи дека на овие принципи Република Српска денес разговара и соработува со влијателни адреси на сите меридијани на светот.
„Токму затоа, таквите средби повеќе не се исклучок, туку природен резултат на политиката што Република Српска ја води со години. Сите успеси во тоа припаѓаат пред сè на српскиот народ. Народот кој низ историјата покажал дека нема други принципи освен слобода, правда и христијански вредности. Токму тие вредности нѐ поврзуваат со многу луѓе ширум светот, па дури и со семејството на претседателот на САД, Доналд Трамп, и со политичките кругови кои веруваат дека народите мораат да имаат право да одлучуваат за својата судбина.“
Доналд Трамп Јуниор пристигнува со авион денес во Бања Лука околу 14 часот.