5
Според украинска разузнавачка процена, руските сателити извршиле десетици детални набљудувања на воени објекти и клучни локации ширум Блискиот Исток, со цел да му помогнат на Иран во нападите врз американските воени сили и други цели. Заклучоците, во кои увид имал „Ројтерс“, укажуваат и на тоа дека руските и иранските хакери соработуваат во сајбер-просторот. Овие процени претставуваат најдетален извештај досега за тоа како Русија му давала тајна поддршка на Иран откако Израел и САД започнаа агресија врз таа земја на 28 февруари.
Според процената, која не е датирана, руските сателити извршиле најмалку 24 набљудувања на подрачја во 11 земји на Блискиот Исток во периодот од 21 до 31 март, опфаќајќи 46 „објекти“, вклучително и американски и други воени бази, како и локации како аеродроми и нафтени полиња. Во рок од неколку дена по набљудувањата, воените бази и штабови биле цел на ирански балистички ракети и беспилотни летала, се наведува во извештајот, кој опишува јасен образец.
Подрачјата на Турција, Јордан, Кувајт и Обединетите Арапски Емирати исто така биле под сателитски надзор двапати, додека локации во Израел, Катар, Ирак, Бахреин и поморската база Диего Гарсија биле надгледувани по еднаш, се наведува во извештајот.
„Ројтерс“ не бил во можност независно да ја потврди содржината на украинската процена.
Портпаролката на Белата куќа, Оливија Велс, изјави дека никаква надворешна поддршка за Иран од која било земја не влијаела врз оперативниот успех на САД. Иранското Министерство за надворешни работи не дало коментар, додека руското Министерство за одбрана не одговорило на барањето за изјава.