6
Венс ќе се сретне со Орбан во вторник наутро, по што ќе одржи говор на настанот „Ден на унгарско-американското пријателство“ во спортскиот парк МТК.
„Ќе разговараме за низа теми поврзани со односите меѓу САД и Унгарија“, изјави Венс пред новинарите при заминувањето од воздушната база Ендрјус во близина на Вашингтон.
Тој додаде дека е уверен дека разговорите во голема мера ќе се однесуваат на Европа, Украина и сите други прашања.
Претседателот на САД, Доналд Трамп, за време на својот втор мандат повеќепати изрази поддршка за унгарскиот премиер.
„Го поддржувам на претстојните избори; всушност, целосно стојам зад него“, порача американскиот претседател.
Кампањата на Виктор Орбан е фокусирана на надворешнополитички теми, во кои тој игра важна улога одржувајќи добри односи и со Доналд Трамп и со рускиот претседател Владимир Путин.
Меѓутоа, анкетите на независни институти предвидуваат убедлива победа на партијата Тиса, предводена од проевропскиот конзервативец Петер Маѓар. Од друга страна, провладините агенции најавуваат победа на коалицијата Фидес-КДНП.
Маѓар за само две години изгради опозициско движење што е способно да ја загрози доминацијата на актуелниот унгарски лидер, кој ја трансформираше земјата во модел на нелиберална демократија.
Откако се врати на власт, администрацијата на Доналд Трамп ја прекина традиционалната воздржаност што претходните американски влади ја покажуваа кон изборите во други земји. Наместо тоа, сега отворено и силно ги поддржуваат лидерите што ги сметаат за идеолошки и дипломатски блиски.
Така, и американскиот државен секретар Марко Рубио во средината на февруари ја посети Будимпешта и на својот унгарски сојузник му посака „успех“.
„Можам со сигурност да ви кажам дека претседателот Трамп е длабоко посветен на вашиот успех, бидејќи вашиот успех е и наш успех“, изјави Рубио на заедничката прес-конференција со Орбан по состанокот.
Орбан е особено усогласен со администрацијата на Трамп по прашањето на антимигрантските политики, кои во Унгарија дојдоа до израз за време на бегалската криза пред десет години. Унгарскиот премиер повеќепати го посетил одморалиштето Мар-а-Лаго во Флорида.