15
Претседателот на Србија, Александар Вучиќ, во текот на вчерашниот ден изјави, по состанокот со највисокото раководство на Министерството за одбрана и Војската на Србија, дека предложил изработка и усвојување стратегија за роботизација и формирање единица опремена со роботизирани платформи.
Тој се состана со највисокото раководство на Министерството за одбрана и Војската на Србија во касарната „Бањица 2“ во Белград.
„Денеска предложив, како врховен командант на Војската на Србија, изработка и усвојување стратегија за роботизација, формирање единица од ранг на баталјон опремена со роботизирани платформи, спроведување организациски подготовки за формирање дивизија и баталјон на далекуметни нападни беспилотни летала и лутачка муниција, обука на специјалните и извидувачките единици за одредување координати на цели за управување со артилериски и авијациски оган, како и понатамошно опремување и оспособување за употреба на беспилотни летала во останатите единици“, изјави Вучиќ пред новинарите по состанокот, пренесува РТС.
Тој истакна дека извлекол „историски поуки“ за офицерите и додаде дека многумина од нив се легендарни команданти од времето на НАТО-агресијата, како и дека има многу млади кои од нив, но и од други офицери, имале многу што да научат.
„Ги замолив во овој револуционерен период на големи промени во нашата војска, дигитализација и роботизација на нашата армија, употреба на најмоќните и најсовремени ракети, да учествуваат со огромен ентузијазам, уште поголема посветеност и голема енергија“, рече Вучиќ.
Тој наведе дека безбедносната состојба е нешто посложена отколку во јануари, пред сè поради дејствувањето и понатамошните активности на воениот сојуз на Приштина, Тирана и Загреб.
„Нашата определба да го чуваме мирот и стабилноста не е променета, а тоа можеме да го зачуваме само ако сме доволно силни“, изјави претседателот Вучиќ.
Тој им се заблагодари на претставниците на раководството на Република Српска кои присуствувале на состанокот и кои, како што рече, имале можност да ја согледаат безбедносната состојба и можните закани за безбедноста на Република Србија и регионалниот мир и стабилност, како и состојбата на воената моќ на Србија, одбранбените потенцијали и капацитети, како и капацитетите што Србија допрва планира да ги набави за дополнително унапредување на тие способности.
На состанокот присуствуваа министерот за одбрана Братислав Гашиќ, началникот на Генералштабот на Војската на Србија, генерал Милан Мојсиловиќ, како и членовите на колегиумот на министерот за одбрана и началникот на Генералштабот.