Во обраќањето на свечената седница на Централниот одбор на СДСМ, по повод 35 години од формирањето на партијата, претседателот Венко Филипче порача дека јубилејот не е само повод за одбележување, туку и повик за нова, чесна и одлучна борба за праведна Македонија.
-СДСМ повторно излегува пред граѓаните со јасна определба за промени и враќање на власта таму каде што припаѓа, во рацете на граѓаните. Тргнуваме против оваа ненародна криминална предавничка власт, одново чисти, скромни, искрени и посоцијалдемократски од кога било досега, рече, Филипче.
Во своето обраќање, претседателот Филипче подвлече дека денес СДСМ повторно стои пред голема историска и политичка задача – да ја врати надежта, правдата и европската перспектива на државата.
-Затоа СДСМ денес е тоа што бил и ќе биде секогаш – големата идеја за Македонија како пристојна, праведна и европска држава, рече Филипче.
Тој посочи дека оваа визија значи држава во која граѓаните ќе живеат достоинствено, а младите ќе имаат причина да останат и да ја градат својата иднина дома.
-Тоа значи млад човек да може да купи прв дом, а да не се чувствува протеран од својата татковина. Тоа значи платата да расте, но и животот да стане поднослив. Тоа значи болницата да не биде место на страв, туку на доверба. Тоа значи училиштето да не биде чекална за иселување, туку подготовка за останување и изградба на татковината, истакна Филипче.
Претседателот на СДСМ потенцираше дека суштината на новата политичка понуда е нов социјален и европски договор со граѓаните, заснован на правда, солидарност и еднакви шанси.
-Затоа, вечерва да не си ветуваме лесни победи. Да си ветиме тешка политичка и демократска борба и чесност. Да си ветиме правда. Да си ветиме правични даноци. Да си ветиме држава што не се плаши од вистината. Да си ветиме политика достојна за Македонија, истакна претседателот на СДСМ, Венко Филипче.
*Филипче: Закочениот европски пат е најголемото предавство кон иднината на Македонија*
Претседателот на СДСМ, Венко Филипче, на свечената седница на Централниот одбор по повод 35 години од формирањето на партијата, порача дека блокадата на европскиот пат претставува најсериозната закана за иднината на државата и дека тоа е предавство на националните интереси.
-Денес Македонија повторно е пред голем испит. ЕУ патот е закочен. Отворено и бессрамно ни кажуваат дека тоа ќе трае и натаму со децении, божем како заштита на националните и државни интереси. Тоа е безобзирна лага, истакна Филипче.
Тој нагласи дека европската интеграција е врвен национален и државен интерес.
-Нема поголем интерес, ниту државен, ниту национален, ниту безбедносен, ниту демократски од сојузите со ЕУ и НАТО”, порача Филипче.
Претседателот Филипче потсети дека токму СДСМ носел историски одлуки кои ја движеле државата напред кон евроатлантските интеграции, дури и кога тие одлуки биле тешки и непопуларни.
Во таа насока, Филипче потенцираше дека денешните политики кои го блокираат европскиот пат се директно спротивни на националните интереси.
На нивна страна е срамот! А тоа е страната на предавството на националните интереси, на антиевропските политики, истакна Филипче.
Тој предупреди дека застојот на европската перспектива значи застој на државата и губење на иднината за младите генерации.
-Тоа значи училиштето да не биде чекална за иселување, туку подготовка за останување и изградба на татковината, рече Филипче, нагласувајќи дека европскиот пат е клучен за подобар животен стандард и сигурност на граѓаните.
Претседателот на СДСМ порача дека партијата останува доследна на својата европска ориентација и ќе продолжи да се бори за враќање на државата на вистинскиот пат.
-Затоа СДСМ денес е тоа што бил и ќе биде секогаш – големата идеја за Македонија како пристојна, праведна и европска држава, нагласи претседателот на СДСМ, Венко Филипче во обраќањето.