Опозициската СДСМ побара итно запирање на процесот за отворање на нов рудник за антимон во кривопаланечкото село Луке, инсистирајќи на поширока јавна дебата и директно изјаснување на граѓаните преку локален референдум. Од партијата нагласуваат дека најавата на премиерот Христијан Мицкоски за овој проект е сериозно прашање кое задира во одлучувањето за државните ресурси, здравјето на луѓето и иднината на локалните заедници.
„За најавата на Мицкоски за отворање рудник со антимон во кривопаланечко Луке мора да има поширока јавна дебата и секако да се прашаат граѓаните, тие да одлучат“, соопштија од СДСМ, посочувајќи дека државата нема кредибилитет да отвора нови рудници додека со децении не го решава старото еколошко жариште Лојане. Од партијата додаваат дека не се против инвестиции, но дека моделите не смеат да бидат фокусирани исклучиво на профитот со висок ризик по здравјето на граѓаните.
СДСМ смета дека пред да се размислува за каква било активност, Владата мора да исполни неколку клучни услови кои ќе гарантираат еколошка и здравствена заштита. Како прв приоритет се наведува итното решавање на постојните еколошки жаришта, по што треба да следува целосна транспарентност со јавно објавување на сите договори, економски параметри и студии за влијание врз животната средина.
„Граѓаните имаат право да знаат дали има скриени профити, имајќи ја предвид целата криминална мрежа на фирми и бизниси на Мицкоски“, обвинуваат од опозицијата. Тие бараат системот да биде целосно затворен еколошки без никакви испуштања во почвата, водата или воздухот, како и однапред обезбедена финансиска гаранција од инвеститорот за евентуална санација на штети.
Покрај еколошките стандарди, СДСМ инсистира на воспоставување независен мониторинг со податоци достапни во реално време, како и директен економски бенефит за општината и нејзините жители. Како посебен услов се наведува континуираната здравствена заштита и следење на здравјето на населението, што би било финансирано директно од страна на инвеститорот.
Од партијата се децидни дека доколку овие ригорозни услови не бидат во целост исполнети, подобро е проектот воопшто да не се реализира. Според нив, прашањето за рудникот во Луке не е само техничко, туку прашање за иднината и цената која генерациите би ја платиле преку загадена вода и уништено земјоделие.