Војската на САД денеска соопшти дека вчера нападнала брод за шверц на дрога во Карипското Море.
Во нападот загинале три лица.
Јужната команда на војската на САД наведе дека цел биле наводни трговци со дрога долж познатите рути за шверцување. Кампањата на напади врз бродови во латиноамериканските води под обвинение за наркотероризам трае од минатиот септември.
Американскиот претседател Доналд Трамп изјави дека САД се во вооружен конфликт со наркокартелите во Латинска Америка и дека тоа е неопходно за да се спречи шверцот на дрога во земјата.
Во овие напади досега загинаа најмалку 181 лице. Војската на САД изврши напади врз бродови и во Тихиот Океан. Таа досега не обезбеди докази дека кој било од нападнатите бродови пренесувал дрога. Кампањата повторно се засили во последната недела.
Нападите почнаа месеци пред САД да го уапсат тогашниот претседател на Венецуела, Николас Мадуро. Тој беше однесен во Њујорк под обвинение за трговија со дрога. Мадуро се изјасни за невин.