Две лица ангажирани во скопскиот Кривичен суд се уапсени под сомнение за вмешаност во коруптивни активности и барање поткуп, дознава неофицијално порталот „Прес24“.
Според информациите, едното лице, вработено како судски полицаец, побарало 1.000 евра од странка во судски спор, со ветување дека ќе посредува и ќе „поткупи“ судија во Апелациониот суд во Скопје, со цел предметот да биде решен во корист на странката. Откако предметот завршил неповолно за оштетениот, случајот бил упатен до Врховниот суд.
Во таа фаза, осомничениот повторно стапил во контакт со странката и побарал дополнителни 500 евра, тврдејќи дека ќе влијае врз одлуката на судиите во Врховниот суд. Наместо да ги исплати средствата, оштетениот го пријавил случајот во полиција.
По претходно договорена средба, судскиот полицаец бил фатен со обележани пари, по што веднаш бил лишен од слобода. Од страна на надлежен суд, нему му е изречена мерка притвор. Во текот на истрагата, од мобилниот телефон на осомничениот биле обезбедени податоци за комуникација со повеќе лица. Анализата покажала дека тој, во овој и во други слични случаи, наводно соработувал со второ лице – вработено во судот како судски доставувач.
И за второосомничениот е определена мерка куќен притвор. Истражните органи продолжуваат со постапката за целосно расчистување на случајот и утврдување на евентуална вмешаност и на други лица. Оваа информација засега не е официјално потврдена од надлежните институции.