По серијата од три масовни протести и три блокади на клучните институции од почетокот на годинава, направен е детален извештај за тоа кои сектори добија зголемување на платите, а каде власта и работодавачите останаа глуви на работничките барања, соопштија од Сојузот на синдикати на Македонија (ССМ).
Синдикатот потсетува дека работничкото незадоволство кулминираше на улиците на 28 јануари, 14 март и за 1 Мај, кога десетици илјади работници излегоа со клучни барања за раст на минималната и останатите плати, додека истовремено беа блокирани Собранието, Владата и Стопанската комора. Главниот заклучок на организацијата е дека Владата и работодавачите го игнорирале главното барање за минимална плата од 600 евра, па така, без нивна согласност, минималецот беше усогласен за само 1.667 денари во нето износ.
Сепак, синдикалниот притисок резултирал со поместувања во повеќе сектори. Според податоците на ССМ, договорено е зголемување од околу 40 отсто за 11.000 вработени во управата и правосудството во период од 25 месеци, при што првото покачување изнесува од 12 до 14 отсто. Вработените во МВР добија усогласување на платата за 1.667 денари нето, колку што се усогласи и минималната плата. Во образованието платите пораснаа за 7,5 отсто, во културата за 6,8 отсто, а во здравството бележат зголемување од 6 отсто. Раст на примањата од 3.000 до 5.000 денари во нето износ е забележан и во поголем број општини, додека во над 80 отсто од јавните комунални претпријатија платите се зголемија согласно порастот на просечната плата за најмалку 9,6 отсто.
Што се однесува до приватниот сектор, во најголем дел од претпријатијата каде работниците се синдикално организирани преку ССМ, платите пораснале помеѓу 2.000 и 12.000 денари нето. За несиндикализираните работници нема податоци, освен за оние чии плати законски морале да се израмнат со новиот минималец од 26.046 денари. Од друга страна, од ССМ посочуваат дека вработените во Армијата и некои други дејности во јавниот сектор добиле нула отсто зголемување.
Синдикатот наведува фрапантни податоци од УЈП за минатата година, според кои од околу 530.000 работници, повеќе од половината земале плата под 600 евра, додека над една третина биле платени под 31.200 денари. Од Сојузот на синдикатите порачуваат дека платите најчесто се усогласуваат со минималната плата, па затоа, сè додека работниците не разберат дека во нив е силата и дека нивното непочитување се искажува на улица, власта и газдите ќе бидат здружени против нив.
Ј. Ѓ.