Премиерот Христијан Мицкоски брза со најавите за предвремени парламентарни избори исклучиво од страв од истрагите што следуваат по падот на неговиот политички пријател Виктор Орбан во Унгарија, обвини на денешната прес-конференција генералниот секретар на опозициската СДСМ, Александар Саша Димитријевиќ.
Според партијата, со падот на Орбан почнува распадот на криминалната мрежа што со години се градела во регионот. Димитријевиќ нагласи дека во Унгарија веќе се најавуваат истраги кои ќе стигнат до Мицкоски и до српскиот претседател Александар Вучиќ, при што под лупа ќе се најдат сите братски бизнис-шеми, Орбановата медиумска мрежа, сомнителните тендери, како и телекомуникациските и енергетските бизниси. Токму стравот од овие истраги и одговорноста, како и фактот дека снемува пари за тендери, се главниот мотив поради кој ВМРО-ДПМНЕ веднаш почнува со подготовки за избори.
Осврнувајќи се на досегашното владеење на власта, од СДСМ посочуваат дека по две години, Мицкоски нема ниту едно исполнето ветување, ниту еден резултат, а државата е заглавена со блокиран европски пат. Наместо ветеното враќање на името, поништување на Преспанскиот договор и економски бум, реалноста се празните фрижидери и џебови на граѓаните. Димитријевиќ обвини дека нема повисоки плати, нема минимална плата од 600 евра, инвестициите се намалени за 60 отсто, а бројот на вработени во индустријата е намален за 4.000 лица. Дополнително, тој истакна дека премиерот создал нов долг од 2,3 милијарди евра кој води кон финансиска неизвесност.
Во услови кога коалицијата му се распаѓа и пратеници разочарани го напуштаат мнозинството, Мицкоски се служи со својот стар рецепт за создавање тензии и напади врз опозицијата. Од СДСМ велат дека токму затоа повторно е активирана кампањата за „предавници“ и создавањето вештачки конфликт со Бугарија, со цел други да бидат виновни за неговиот неуспех. Сепак, опозицијата порачува дека граѓаните веќе ги прочитале лагите и лажниот патриотизам кој не носи подобар живот, додавајќи дека СДСМ е подготвена да ја врати државата на вистинскиот пат.