Претседателот на Сојузот на синдикати на Македонија (ССМ), Слободан Трендафилов, преку објава на социјалните мрежи упати остра критика до надлежните поради одлуката минималната плата само да се усогласи, а не и значително да се зголеми. Тој со загриженост констатира дека со усогласувањето на платите и априлската инфлација, работник кој прима минимална плата реално добил маргинално зголемување на своите примања.
Трендафилов ги презентираше и конкретните бројки за состојбата со инфлацијата во април. Додека минималната плата е усогласена за +6,8%, априлската инфлација изнесува +5,7%. Ова значи дека, по усогласувањето на платите, реалната придобивка за работник на минимална плата е само 1,1% повеќе. Првиот човек на ССМ ја карактеризираше оваа пресметка како нешто што е во рамките на „статистичка грешка“. Тој нагласи дека надлежните одбиле да ја зголемат минималната плата на посакуваното ниво и се решиле само на законско усогласување.
Понатаму, претседателот на ССМ посочи на драстичниот јаз меѓу порастот на минималната плата и растот на трошоците за живот. Вредноста на Синдикалната минимална кошница во периодот од јануари до април е зголемена за 3.304 денари. Во истиот тој период, минималната плата е усогласена за износ од 1.667 денари. Според овие податоци, само за покривање на најосновните потреби на еден работник кој прима минимална плата, му недостасуваат дополнителни 1.637 денари.
Трендафилов ја заврши својата објава со иронична порака кон оние кои активно се бореа да не се зголеми минималната плата. Тој забележа дека на тие што биле против зголемувањето им успеало во намерата и платата не се зголемила на бараното ниво, прашувајќи дали тие „сега сигурно добро се чувствуваат“.