Возач на приватен автобус на линија 63 денеска околу 13 час на пат од Транспортен центар кон селото Мралино, се пишманил и одлучил дека нема целосно да ја заврши рутата, по што ги оставил патниците на автобуската постојка во Илинден, во близина на кружниот тек кај маркетот „Тинекс“, а потоа се вратил назад кон Скопје, изјавија граѓани за „Слободен печат“.
Како што велат патниците, возејќи кон Мралино, возачот постојано велел дека не го знае патот, па затоа тие започнале да му даваат насоки каде да вози и на која постојка треба да застане, а потоа, како што тврдат, тој видно се изнервирал и го застанал автобусот на автобуската постојка „Илинден први мај“, им наредил на патниците да се симнат и ги информирал дека тој нема да вози до последната постојка во Мралино бидејќи, како што велат патниците, не го знаел патот за назад и не знаел како да се врати во Скопје.
Според возниот ред на ЈСП-Скопје, меѓу постојката „Илинден први мај“ падо последната постојка „Мралино“ има уште 16 автобуски постојки каде автобусот број 63 е предвидено да застане, но овој пат возачот направил крукче на кружниот тек во Илинден и се вратил во Скопје, оставајќи ги патниците на пола пат.
Патниците се симнале од автобусот, па за нивна среќа после пет минути дошол автобус на ЈСП-Скопје со бројот 66, во кој тие се качиле и ја продолжиле нивната неочекувана „авантура“ низ Илинден. Патем, автобусот 66 не ја вози истата траса како и приватниот превозник број 63, бидејќи таа линија не влегува во Мралино, туку оди покрај населеното место во правец кон Миладиновци.
Ова е уште еден пример како приватните превозници ненадејно запираат со возење, а сега веќе и оставаат патници на пола пат во Илинден, со што се поставува прашањето дали возачите на приватните автобуси добиваат некои подготовки и пробни возења на рутите по кои треба да пренесуваат патници, но и каква одговорност можат да сносат со постапки слични на оваа погоре, кога шоферот поради неинформираност и недоволна подготвеност на рутата која треба да ја вози, од страв дека нема да може да се врати назад во Скопје, го запира возењето и ги остава патниците да се снаоѓаат како да стигнат до посакуваната локација.