Демократската унија за интеграција (ДУИ) бара одговорност од заменик-министерот за внатрешни работи, Астрит Исени, обвинувајќи го за директен притисок и малтретирање студенти од Република Албанија.
Според партиското соопштение, студентите биле малтретирани со полициска придружба и изолирани, со единствена цел да им се оневозможи учество на студентскиот протест во Скопје.
Од ДУИ сметаат дека ваквите постапки се резултат на недостатокот на етнички легитимитет кај актуелните функционери од Влен.
„Недостатокот на национален легитимитет те прави слуга, а Астрит Исени блеска во таа улога. Браќа од Албанија, драги студенти, ви се извинуваме за овој срам од вазали како Астрит Исени и Влен“,
се вели во реакцијата на партијата.
Од партијата велат дека ги поздравуваат студентските протести, оценувајќи ги како демократски чин и изразувајќи целосна солидарност со барањата на младите.
„Решението е само едно – запрете ја дискриминацијата, почитувајте го и спроведувајте го Законот за употреба на албанскиот јазик. Ништо друго“додаваат од ДУИ.
Денеска со реакција се јави и амбасадорот на Република Албанија во земјава, Денион Меидани, кој во објава на Фејсбук вели дека студенти од Албанија биле запрени и заплашувани додека патувале кон Скопје за да изразат солидарност со нивните колеги од Македонија.
„Кога студентите се запираат, задржуваат и заплашуваат додека патуваат за мирно да изразат солидарност за јазично право, прашањето престанува да биде само процедурално. Тоа влијае на самото демократско разбирање и европскиот дух што се стремиме да го изградиме како регион“,
пишува Меидани.
Тој вели дека студентите од Тирана патувале во Република Северна Македонија не за судири, туку за „граѓанска солидарност и за да поддржат едно елементарно барање: правото да бидат тестирани и да ја вршат својата професија на мајчин јазик“.
„Овие млади луѓе не бараат привилегии. Тие бараат достоинство, еднаквост и почитување на основните права. И барањето за достоинство никогаш не треба да се сфаќа како закана, особено во земјите кои се стремат да се приклучат кон европското семејство и да ја градат својата иднина врз вредностите на демократијата, еднаквоста и основните права“додава тој.
Инаку, вчера во Скопје се одржа протест под слоганот „Обединете се со студентите – сите заедно“ и е втор собир организиран од студентите на кој тие бараат да се овозможи полагање на правосудниот испит на албански јазик.