Годишниот аџилак – хаџот, еден од петте столба на исламот, официјално започна денеска во услови на нестабилно примирје во иранската војна и зголемени регионални тензии и неизвесност.
Повеќе од 1,5 милиони аџии пристигнаа во Саудиска Арабија, соопшти претставникот задолжен за хаџот, Салех бин Саад ал Мураба.
Аџилакот е еден од петте столба на исламот и секој муслиман кој има можност треба да го изврши најмалку еднаш во животот. Тој опфаќа низа ритуали што се изведуваат најмалку четири дена во Мека и во нејзината околина, во западниот дел на Саудиска Арабија.
Вообичаено, првиот ден многу аџии во Мека се собираат во голем камп со шатори во блиската пустина. Претходно, аџиите на високи температури кружеа околу Ќаба, градба во форма на коцка сместена во Големата џамија.
Некои верници со години се надеваат и се молат дека еден ден ќе можат да го извршат хаџот, штедат пари и чекаат дозвола за патување.
Изложени на силна жештина додека ги извршуваа верските ритуали, многу аџии користеа чадори за заштита од сонцето и носеа рачни вентилатори. Волонтерите делат шишиња со вода, а големи вентилатори распрскуваат ситни капки вода за разладување.
Пред тргнувањето на пат, дел од аџиите изјавија дека се потпираат на својата вера и покрај тензиите во регионот, како и дека чувствуваат огромна благодарност што имаат можност да го остварат ова патување.
Утре, кога се смета дека е врвот на аџилакот, верниците ќе се соберат на молитва на планината Арафат, каде што пророкот Мухамед ја одржал својата последна проповед.
Хаџот собира голем број муслимани од различни раси, етничко потекло, јазици и економски класи, создавајќи чувство на единство кај многумина.
Поради глобалната неизвесност и безбедносните ризици, властите во Индонезија, земја со најголема муслиманска популација во светот, пред почетокот на сезоната на хаџот ставија акцент на безбедносните планови и издадоа насоки со цел да обезбедат дополнителните патни трошоци да не паднат на товар на самите индонезиски аџии.
Во Индија, каде што живее големо муслиманско малцинство, подготовките за хаџот главно се одвиваа редовно, но високите цени на горивото предизвикани од иранската војна ги зголемија трошоците за патување на аџиите.