Во Нови Сад попладнево со свечена академија ќе бидат одбележани „80 години од преселувањето на Македонците во Војводина“.
На свечената академија ќе се обратат премиерот на Северна Македонија, Христијан Мицкоски, претседателот на Владата на Србија, Ѓуро Мацут, претседателката на Покраинската влада на Војводина, Маја Гојковиќ, како и претседателката на Националниот совет на македонското национално малцинство во Република Србија, Зорица Митровиќ.
На 25 мај, премиерот на Србија, Мацут, во Белград одржа разговори со претседателката на Националниот совет на македонското национално малцинство, Зорица Митровиќ, за подобрување на положбата на припадниците на македонското малцинство. Како што тогаш соопшти Владата на Србија, тој изјавил дека Србија и Северна Македонија се братски и пријателски земји, насочени кон соработка, меѓусебно почитување и заеднички просперитет.
„Националните малцинства се вистинско богатство на оваа држава, со кое се гордееме“, изјави Мацут, додавајќи дека почитувањето на различностите и еднаквоста на сите граѓани е темел на здраво и напредно општество.
На средбата, на која присуствувал и амбасадорот на Република Северна Македонија во Србија, Никола Тупанчевски, било разговарано и за денешната годишнина што ќе се одбележи во Нови Сад – 80 години од преселувањето на Македонците во Војводина.
Извор: mk.tv21.tv